SUMENEP, koranmadura.com – Dinas Pendidikan (Disdik) Kabupaten Songenep, Madura, Jhaba Tèmor mabada lomba kaangghuy milè siswa sè bhadi èkèrèm ka Olimpiade Olahraga Siswa Nasional (O2SN) 2019 tingkat Sekolah Dasar (SD) tor sè sadharajat.
Lomba èlaksanaaghi neng GOR Ahmad Yani Panglegur èkabidhi arè Kamis kantos Sabtoh, 11-13 April 2019. Bada lalèma macem cabang lomba, è antarana Kids Athletiks otabana atletik kaaghuy kana’ kèni’, Bulu Tangkis, Renang, Karate sareng Pencak Silat.
Sè ngirèng lomba aropaaghi bakkèl dari 27 kacamatan è Songenep sè ampon ngalampani tahap seleksi tingkat kacamatan. Sadhajana aropaaghi siswa tingkat dhasar kelas IV kantos kelas VI.
“Alhamdulillah, sadhaja bakkèl kacamatan bhakal noro’ lomba tamaso’ bakkèl dari kacamatan sè bada è polo,” dhabuna Pelaksana Tugas (Plt) Kopala Dinas Pendidikan (Disdik) Kabupaten Songenep, Muhammad Saidi, Kamis, 11 April 2019.
Saidi ajharbaaghi, dari seleksi sè èlampaaghi saabitta tello arè akadhi ampon kasebbhut, hasèl èpon bhakal èbina minangka kasiapan noro’ seleksi tingkat Provinsi Jhaba Tèmor se rencana epon bhadi kalampa e bulan Juli sè bhakal dateng.
“Ngamri nyiapaghi olahragawan profesional asal Kabupaten Songenep kaangghuy alagha neng tingkat nasional otaba internasional,” dhabunah Saidi.
Saidi nambaaghi pamator, sadhaja se bhadi kalampa jhuganan minangka usaha kaangghuy nombuaghi panglèbura siswa è dalem bidang peserta olahraga.
Disdik jhuganan terro nombuaghina tèngka sportif, kompetitif, tor rasa tangghung jawab asartana lèbur olahraga de’ sadhaja peserta.
Sekadar èkaoningi, molaè kabidhan lalampan O2SN è taon 2006 sè tapongkor, Kabupaten Sumenep ampon dukalè ngaollè juara tingat nasional.
“Kaulah andi’ kayakinan è taon sanonto Songenep bisa ollè juara polè,” dhabunah Saidi. (Fathol Alif/Ghazi M/D4N)
*Berita ka’dinto ampon tèrbit kalaban basa Indonesia sè judul èpon Disdik Sumenep Seleksi Siswa untuk Diikutkan O2SN 2019
